尖山國小臺灣母語日

拄著困難的時陣            李宗壕

各位評判老師、各位同學逐家好！我是第  號，今仔日我欲演講的題目是「拄著困難的時陣」

人講「花無百日紅；人無千日好」，生活當中定定會有無如意的時陣，甚至有意外來發生。若是拄著欲按怎咧？

會記得舊年歇熱的時，阮規傢伙仔歡歡喜喜坐著阿爸彼台寶貝仔車，欲去墾丁佚陶，想未到去拄著大車禍，幾若台車撞撞做一伙，好佳在阮車壞人無代，我及小弟因為取消行程大細聲唉，阿母就安慰阮講：毋通怨嘆，愛感謝祖先及天公伯仔保庇，乎咱平安無代誌。自細漢阿母就教阮拄著問題及困難，愛用好的心態去面對，才會當好好仔解決。

佇我四年仔的時，毋知是啥原因，全班無人敢佮我做朋友。謼﹗ 拄著這款代誌，我真艱苦，成績雄雄退步一大節。老師就共我講：「人若精彩，天安排，友誼是無法度強求的。」我共家己講：「毋管拄著啥物款的困難，攏愛提出勇氣，面對挑戰﹗」是啦﹗硬挽的瓜袂甜，我就打拼等待在叢黃！我一方面同款保持笑容佮誠懇的態度來對待同學，頭起先大家猶是無意仔無意；另外一方面，我「拍斷喙齒，含血吞」， 誠綿爛讀冊，考試提著頭名，嘛真熱心教袂曉數學的同學，沓沓仔大家就開始閣和我有講有笑矣，困難就按咧消失甲無看見影跡。

    咱臺灣有一个少年人，共食苦當做食補，勇敢去挑戰困難，伊就是我心目中的英雄、我上崇拜的極地超級馬拉松運動員－－陳彥博。伊用五年的時間去挑戰世界七大洲八大站，得著四大極地賽總冠軍。其實伊是一個嚨喉管癌的患者，倚靠勇敢奮鬥的意志、無愛失敗的決心，總是共家己講：「 閣拚一下，只要堅持到落尾，就是勝利者。」

   伊的故事攏會在我拄到困難的時陣出現在我的頭殼內，「困難，我衝會過；痛苦，我擋會過。」伊的這句話總是會鼓勵我，讓我提出勇氣、面對困境、去解決所有的困難!是啦!生活中雖然有真濟的挑戰，毋過只要咱願意相信家己，拄著困難免著驚，碰著難關免驚惶，心掠予定骨力拚，總是會當拚出好名聲。 我就講到遮，感謝逐家！